Den magiske ullbyen

Årets Ullveke vert sparka i gang 19. oktober, med ein storslått opning på Sentrumstorget.

– Ein flott tradisjon som fremjar regionens lokale ulltradisjonar, seier leiar ved Knarvik Senter, Åge Torsvik.

Marknad og catwalk

Det vil vere Ullmarknad i Senteret, både fredag og laurdag, med lokale utstillarar. Her kan ein få kjøpt flotte varer av ull.

– Vi har fått med oss rundt 20 framifrå lokale produsentar, og kjem til å ha marknad i to heile dagar her på Knarvik Senter, fortel senterleiar Torsvik.

På sjølve opninga blir det catwalk, med strikkemodellar frå Hillesvåg Ullvarefabrikk, designarane Linda Marveng og Kari Hestnes samt årets Redd Barna-kolleksjon frå designerduoen Arne & Carlos.

Dei to designerane har, i samarbeid med vekebladet Hjemmet og Hillesvåg Ullvarefabrikk, laga ein kolleksjon som skal gi delar av inntekta til Redd Barnas arbeid for barn i naud.

Årets ullveke har òg eit innslag av det norrøne slaget. Nordhordland Frie Vikingar kjem nemleg for å fortelje om ulike kurs og foredrag dei skal halde under Ullveka – og dei kjem i full vikingpåkledning.

Eventyrskogen

Rett etter opningen av Ullveka, er det duka for opning av årets Ullby. Dette har lenge vore ein tradisjon, og markerar såleis starten på heile Ullveka.

– Årets tema er «eventyrskogen», så i år har fantasien verkeleg fått utfolda seg, fortel Torsvik.

1415 elevar frå skular over heile Nordhordland har i fleire månader laga figurar og kulissar i ull.

– Hillesvåg Ullvarefabrikk og Knarvik Senter har sendt ut 40 kilo ull, og tilverkingsutstyr til skulane som deltek i prosjektet, kan senterleiar Torsvik fortelje.

Utstillinga skal stå på Sentrumstorget i tre heile veker etter opninga.

– Det har vore eit stort engasjement frå skulane, og mange har vore innom Hillesvåg Ullvarefabrikk for å henta endå meir ull og utstyr, så det er berre å gle seg til opninga, seier Torsvik.

Villy Villsau kjem sjølvsagt også!

Den offisielle opninga av Ullveka skjer fredag 19. oktober klokka 18.00, på Sentrumstorget.
Ullbyen åpnar klokka 19.00

Ullbyen 2018 vert ståande til og med lørdag 10. november.